საიტზე მიმდინარეობს ტექნიკური სამუშაოები

ელჩის მისასალმებელი სიტყვა

 

მოგესალმებით ჩვენი საელჩოს ვებგვერდზე.

საქართველოსა და ავსტრიას მრავალსაუკუნოვანი ისტორია აკავშირებს. ჯერ კიდევ XIX საუკუნეში ავსტრია-უნგრეთის მონარქია დიდ მნიშვნელობას ანიჭებდა საქართველოსთან ურთიერთობას, რასაც ის ფაქტიც მოწმობს, რომ სამხრეთ კავკასიაში არსებული სამი საკონსულოდან, ორი საქართველოში - თბილისსა და ბათუმში - მდებარეობდა.

1992 წელს ავსტრია ერთ-ერთი პირველი იყო ევროპულ სახელმწიფოთა შორის, რომლებმაც საქართველოს დამოუკიდებლობის აღდგენა აღიარეს. საქართველომაც თავისი ერთ-ერთი პირველი დიპლომატიური წარმომადგენლობა ვენაში გახსნა.

საქართველო უძველესი კულტურისა და ცივილიზაციის ქვეყანაა. ჩვენი ხალხი ყოველთვის გამოირჩეოდა კულტურული მრავალფეროვნებით, სტუმართმოყვარეობითა და თავისუფლების სიყვარულით. საქართველომ, IV საუკუნეში ქრისტიანობის მიღებით, იმ ფასეულობებს მიანიჭა უპირატესობა, რომელსაც ევროპული ცივილიზაცია ეყრდნობა. მას შემდეგ ქვეყანამ ბევრი ქარტეხილი გამოიარა, თუმცა უცვლელი დარჩა საქართველოს ხალხის არჩევანი, კუთვნილი ადგილი დაიკავოს ევროპულ ოჯახში.  

დამოუკიდებლობის აღდგენის შემდეგ საქართველოს საგარეო უწყებამ არაერთი ნაბიჯი გადადგა ზემოხსენებული მიზნის მისაღწევად. ამ მუშაობის ყველაზე თვალსაჩინო შედეგია ევროპასთან თავისუფალი და ყოვლისმომცველი ვაჭრობის შეთანხმება და  შენგენის ზონის ქვეყნებში უვიზო მიმოსვლა. თუმცა, ჯერ კიდევ ბევრია გასაკეთებელი იმისთვის, რომ საქართველო გახდეს ევროკავშირისა და ნატოს სრულფასოვანი წევრი.

იმავდროულად, კვლავ გამოწვევად რჩება რუსეთის მიერ აფხაზეთისა და ცხინვალის რეგიონების ოკუპაცია. ჩვენ მადლიერი ვართ ავსტრიის ხელისუფლების, რომელიც მტკიცედ უჭერს მხარს საქართველოს ტერიტორიულ მთლიანობას და კონფლიქტის მშვიდობიანად მოგვარების პოლიტიკას.

საქართველოსა და ავსტრიის სახელმწიფო უწყებათა აქტიურად თანამშრომლობის გარდა, აღსანიშნავია ავსტრიული ბიზნესისულ უფრო მზარდი დაინტერესება საქართველოს ენერგეტიკის, ტურიზმის, სოფლის მეურნეობის,  ტრანსპორტისა და სხვა სექტორებით. ბოლო წლებში საგრძნობლად იმატა ორ ქვეყანას შორის ტურისტების მიმოსვლამ.

საელჩო იცავს საქართველოს ეროვნულ ინტერესებს საერთაშორისო სამართლისა და მულტილატერალიზმის იმ დიდ ასპარეზზე, რომელსაც ვენაში განლაგებული საერთაშორისო ორგანიზაციები ქმნიან. ჩვენ წარმოვადგენთ საქართველოს ეუთოში, გაეროს ვენის ოფისში, ატომური ენერგიის საერთაშორისო სააგენტოში, ბირთვული ცდების ყოვლისმომცველი აკრძალვის ხელშეკრულების ორგანიზაციაში, გაეროს ინდუსტრიული განვითარების ორგანიზაციასა და საერთაშორისო ანტიკორუფციულ აკადემიაში. ჩვენ ვიყენებთ მრავალმხრივ პლატფორმებს, რათა კონსოლიდაცია გავუწიოთ საერთაშორისო თანამეგობრობის ქმედით დახმარებას საქართველოს წინაშე მდგარ გამოწვევებთან გასამკლავებლად.

საელჩო აქტიურად თანამშრომლობს ავსტრიაში მცხოვრებ თანამემამულეებთან და დიასპორულ ორგანიზაციებთან. ყოველთვის მზად ვართ საინტერესო ინიციატივებისა და პროექტების განსახორციელებლად. ვიმედოვნებთ, რომ ავსტრიაში მცხოვრები ქართველები და საელჩო ერთობლივი ძალისხმევით უკეთ წარმოვაჩენთ ჩვენ ქვეყანასა და მის მიღწევებს.  

ვებგვერდის მეშვეობით რეგულარულად მოგაწვდით ინფორმაციას დაგეგმილი და ჩატარებული ღონისძიებების, საქართველოში განვითარებული მოვლენებისა და სხვა სიახლეების შესახებ.

დავით დონდუა
საქართველოს საგანგებო და სრულუფლებიანი ელჩი