საიტზე მიმდინარეობს ტექნიკური სამუშაოები

ეუთო-ს მუდმივი საბჭოს სხდომაზე არჩილ ტატუნაშვილის გარდაცვალებასა და საქართველოს ორი მოქალაქის, ლევან ქუტაშვილისა და იოსებ პავლიაშვილის უკანონო დაკავების ფაქტთან დაკავშირებით იმსჯელეს

 

2018 წლის 1 მარტს ეუთო-ს მუდმივ საბჭოზე საქართველოს დელეგაციის ინიცირებით ცხინვალის რეგიონში, რუსეთის საოკუპაციო რეჟიმის უკანონო ქმედებების შედეგად, არჩილ ტატუნაშვილის გარდაცვალებასა და საქართველოს კიდევ ორი მოქალაქის, ლევან ქუტაშვილისა და იოსებ პავლიაშვილის დაკავების შესახებ გაიმართა მსჯელობა. აღნიშნულ საკითხზე განცხადება საქმეთა დროებითმა რწმუნებულმა მაკა ბოჭორიშვილმა გააკეთა. მან  ისაუბრა საქართველოს ოკუპირებულ რეგიონებში ადამიანის უფლებათა დაცვის კუთხით არსებულ მძიმე მდგომარეობაზე და აღნიშნა, რომ ოკუპირებულ ტერიტორიებზე მცხოვრები მოსახლეობისთვის სიცოცხლის დაცვის მინიმალური გარანტიებიც კი არ არის უზრუნველყოფილი. აღინიშნა, რომ არჩილ ტატუნაშვილის ტრაგიკული გარდაცვალების ფაქტი არ წარმოადგენს ცალკეულ შემთხვევას. 2016 წლის მაისში რუსმა ე.წ. "მესაზღვრეებმა“ გიგა ოთხოზორიას სიცოცხლე იმსხვერპლეს, ხოლო 2014 წელს ახალგორის რაიონიდან გაუჩინარებული დავით ბაშარულის გარდაცვალება, კვლავ არ არის გამოძიებული.

საქართველოს წარმომადგენელმა დაგმო რუსეთის ფედერაციის პროვოკაციული ქმედებები, რომელიც აფერხებს კონფლიქტის მშვიდობიანად მოგვარებას და საფრთხეს უქმნის უსაფრთხოებასა და სტაბილურობას, როგორც საქართველოში, ისე მთელს ეუთო-ს  რეგიონში. საოკუპაციო რეჟიმის ქმედებები კიდევ ერთხელ ადასტურებს რუსეთის ფედერაციის მიერ 2008 წლის 12 აგვისტოს ცეცხლის შეწყვეტის შესახებ შეთანხმების შესრულების საჭიროებას და ხაზს უსვამს საქართველოს ოკუპირებულ რეგიონებში, უსაფრთხოების საერთაშორისო მექანიზმების შექმნისა და ადამიანის უფლებათა დაცვის მონიტორინგის აუცილებლობას.

საქართველოს დელეგაციამ მოუწოდა საერთაშორისო საზოგადოებას, აიძულოს რუსეთის ფედერაცია, რათა ამ უკანასკნელმა უზრუნველყოს არჩილ ტატუნაშვილის ცხედრის გადმოცემა, ლევან ქუტაშვილისა და იოსებ პავლიაშვილის დაბრუნება საქართველოს ცენტრალური ხელისუფლების მიერ კონტროლირებულ ტერიტორიაზე და ამასთანავე, მოხსნას ყველა დაბრკოლება საქართველოს შესაბამისი ორგანოების მიერ გამოძიების ეფექტიანი ჩატარებისათვის, საერთაშორისო აქტორების შესაძლო თანამონაწილეობით.

საქართველოს ოკუპირებულ ცხინვალის რეგიონში განვითარებულ მოვლენებთან დაკავშირებით შეშფოთება გამოხატეს ეუთო-ში ევროკავშირის, აშშ-სა და მოლდოვას დელეგაციებმა. ევროკავშირის 28 წევრი სახელმწიფოს სახელით გაკეთებულ განცხადებას ასევე მიუერთდნენ: იუგოსლავიის ყოფილი რესპუბლიკა მაკედონია, მონტენეგრო, ალბანეთი, ბოსნია და ჰერცეგოვინა, ისლანდია, ნორვეგია, უკრაინა, მოლდოვა და ანდორა.

ევროკავშირის წარმომადგენელმა მოუწოდა ცხინვალში მოქმედ რეჟიმს, დაუყოვნებლივ გადასცენ ტატუნაშვილის ცხედარი თავის ოჯახს და უზრუნველყონ, საქართველოს ორი მოქალაქის, ქუტაშვილისა და პავლიაშვილის დაბრუნება თბილისის მიერ კონტროლირებულ ტერიტორიაზე. მან აღნიშნა, რომ ევროკავშირი მზადაა, სადამკვირვებლო მისიის (EUMM) მეშვეობით, მხარი დაუჭიროს მიმდინარე გამოძიებებს და ხელი შეუწყოს დისკუსიებს ინციდენტების პრევენციისა და მათზე რეაგირების მექანიზმის  ფარგლებში. ევროკავშირი ასევე მოუწოდებს რუსეთის ფედერაციას შეასრულოს 2008 წლის 12 აგვისტოს ცეცხლის შეწყვეტის შეთანხმებით ნაკისრი ვალდებულებები და მოითხოვს ოკუპირებულ რეგიონებში როგორც ჰუმანიტარული ორგანიზაციების, ისე, ევროკავშირის სადამკვირვებლო მისიის (EUMM), მანდატის შესაბამისად დაშვებას. ევროკავშირმა კიდევ ერთხელ დაადასტურა მხარდაჭერა, საქართველოს სუვერენიტეტისა და ტერიტორიული მთლიანობის მიმართ მის საერთაშორისოდ აღიარებული საზღვრებში.

აშშ-ს დელეგაციამ ღრმა შეშფოთება გამოთქვა რუსეთის მიერ საქართველოს ოკუპირებულ ტერიტორიაზე, სამხრეთ ოსეთში პატიმრობაში მყოფი საქართველოს მოქალაქის, არჩილ ტატუნაშვილის გარდაცვალების ფაქტთან დაკავშირებით და მოუწოდა პასუხისმგებელ პირებს, წარმოადგინონ სრული ინფორმაცია გარდაცვალების გარემოებებთან დაკავშირებით. აშშ-მ ასევე გამოთქვა შეშფოთება საქართველოს მოქალაქეების ლევან ქუტაშვილისა და იოსებ პავლიაშვილის დაკავების ფაქტის გამო და მოუწოდა დე-ფაქტო ხელისუფლებას დაუყოვნებლივ უზრუნველყოს მათი თავისუფალი გადაადგილება ადმინისტრაციულ გამყოფ ხაზზე.  აშშ-ს წარმომადგენელმა ასევე ხაზი გაუსვა 2016 წლის მაისში, ოკუპირებული აფხაზეთის რეგიონის ადმინისტრაციული ხაზის სიახლოვეს საქართველოს მოქალაქის გიგა ოთხოზორიას მკვლელობაში დამნაშავის პასუხისგებაში მიცემის აუცილებლობას.

აშშ-ს წარმომადგენელმა დააფიქსირა მტკიცე მხარდაჭერა საქართველოს ტერიტორიული მთლიანობისა და სუვერენიტეტისადმი მის საერთაშორისოდ აღიარებულ საზღვრებში და დასძინა, რომ აშშ-ს უარყოფს რუსეთის მიერ საქართველოს რეგიონების, აფხაზეთისა და სამხრეთ ოსეთის აღიარებას. მან მოუწოდა რუსეთს, შეასრულოს 2008 წლის ცეცხლის შეწყვეტის შეთანხმების თანახმად ნაკისრი ვალდებულებები და გაიყვანოს შეიარაღებული ძალები კონფლიქტის დაწყებამდე არსებულ პოზიციებზე, ასევე, უკან წაიღოს საქართველოს რეგიონების აფხაზეთისა და სამხრეთ ოსეთის დამოუკიდებელ ქვეყნებად აღიარება და უზრუნველყოს ამ რეგიონებში ჰუმანიტარულ დახმარებაზე ხელმისაწვდომობა.

მოლდოვის წარმომადგენელმა სამძიმარი გამოუცხადა ქართველ ხალხს საქართველოს მოქალაქის არჩილ ტატუნაშვილის გარდაცვალებასთან დაკავშირებით. ასევე აღნიშნა, რომ ეს ტრაგიკული შემთხვევა კიდევ ერთხელ ადასტურებს ეუთო-ს რეგიონში არსებული კონფლიქტების მოგვარების აუცილებლობას. მანვე განაცხადა, რომ სუამ-ის რეგიონის ქვეყნებში არსებული კონფლიქტების მოგვარება უნდა მოხდეს ორგანიზაციის წევრი ქვეყნების სუვერენიტეტისა და ტერიტორიული მთლიანობის დაცვით მათ საერთაშორისოდ აღიარებულ საზღვრებში.