საიტზე მიმდინარეობს ტექნიკური სამუშაოები

საქართველოსა და ავსტრიის საგარეო უწყებებს შორის ორმხრივი პოლიტიკური კონსულტაციების მორიგი რაუნდი გაიმართა

2022 წლის 28 აპრილს, ვენაში, გაიმართა ორმხრივი პოლიტიკური კონსულტაციების მორიგი რაუნდი, საქართველოს საგარეო საქმეთა სამინისტროსა და ავსტრიის რესპუბლიკის ევროპულ და საერთაშორისო საქმეთა ფედერალურ სამინისტროს შორის. საქართველოს დელეგაციას ხელმძღვანელობდა მინისტრის მოადგილე თეიმურაზ ჯანჯალია, ხოლო ავსტრიის დელეგაციას წარმოადგენდა პოლიტიკური დირექტორი, ელჩი გრეგორ კოსლერი.
🔗პოლიტიკური კონსულტაციებისას მხარეებმა ხაზი გაუსვეს საქართველოსა და ავსტრიას შორის მჭიდრო მეგობრულ და პარტნიორულ ურთიერთობებს, რომელიც ეფუძნება საერთო ევროპულ ღირებულებებსა და ინტერესებს. აღინიშნა ორმხრივი ურთიერთობების აქტიური დინამიკა და თანამშრომლობის შემდგომი გაღრმავებისათვის დღის წესრიგში არსებული მაღალი დონის ვიზიტების განხორციელების მნიშვნელობა.
🔗ავსტრიული მხარის ინფორმაციით, უახლოეს მომავალში, თბილისში იგეგმება ავსტრიის განვითარების სფეროში თანამშრომლობის ახალი, 2022-2024 წლების სტრატეგიის ოფიციალური წარდგენა, რომლის ფარგლებში საქართველო კვლავ პრიორიტეტული ქვეყანაა. ხაზი გაესვა ავსტრიის კონტრიბუციას საქართველოს სოციალურ-ეკონომიკური განვითარებისა და დემოკრატიული რეფორმების განხორციელების პროცესში, ასევე, აქტიურ მონაწილეობას ევროკავშირის თვინინგის პროექტებში. მინისტრის მოადგილის განცხადებით, ავსტრიის ჩართულობა და მხარდაჭერა განსაკუთრებულ მნიშვნელობას იძენს იმ ისტორიულ ეტაპზე, რასაც საქართველოს ევროკავშირში გაწევრიანების განაცხადის წარდგენა გულისხმობს.
🔗 მხარეებმა ისაუბრეს ეკონომიკური თანამშრომლობის გაღრმავების პერსპექტივებზე. კმაყოფილებით აღინიშნა, პანდემიის მიუხედავად, ქვეყნებს შორის მზარდი სავაჭრო მაჩვენებლები, რაც არსებულ ეკონომიკურ ინტერესზე მიუთითებს. ხაზი გაესვა ბიზნეს-ფორუმებისა და სავაჭრო მისიების ორგანიზების მხრივ არსებულ დინამიკას. მასპინძელი მხარის ინფორმაციით, ავსტრიელ ბიზნესმენთა მორიგი მისია საქართველოს მ/წლის მაისში ეწვევა. საუბარი შეეხო ტურიზმისა და ენერგეტიკის სფეროებში ისევე, როგორც რეგიონთაშორისი თანამშრომლობის გაღრმავების მხრივ არსებული პოტენციალის სრულად ათვისების შესაძლებლობებს.
🔗 ავსტრიის დელეგაციის ხელმძღვანელი მიესალმა საქართველოს მიერ ევროკავშირის წევრობაზე გაკეთებულ განაცხადს. მინისტრის მოადგილემ იმედი გამოთქვა, რომ ავსტრია მომავალშიც გააგრძელებს საქართველოს ძალისხმევის მხარდაჭერას ევროკავშირში გაწევრიანების გზაზე. მან ისაუბრა კანდიდატი ქვეყნის სტატუსის თვითშეფასების კითხვარის შესავსებად მიმდინარე აქტიურ პროცესზე, ასევე, მასპინძელ მხარეს, მიეწოდა ინფორმაცია ასოცირების შესახებ შეთანხმების განხორციელების მხრივ არსებულ პროგრესზე, მათ შორის, ევროკავშირთან ინსტიტუციური და სამართლებრივი დაახლოების მხრივ, რაც რეალურად საქართველოს ევროკავშირის წევრობისთვის ამზადებს.
🔗 შეხვედრაზე განსაკუთრებული აქცენტი გაკეთდა ევროპაში უსაფრთხოების კუთხით არსებულ მძიმე ვითარებაზე, რაც უკრაინის წინააღმდეგ რუსეთის ფართომასშტაბიანი აგრესიის შედეგად დადგა. მხარეებმა ხაზგასმით აღნიშნეს, რომ უკრაინაში მიმდინარე ომი სცდება მხოლოდ რეგიონის მასშტაბს და წარმოადგენს საფრთხეს საერთო ევროპული უსაფრთხოებისათვის. ამ კონტექსტში, ქართულმა მხარემ მიმოიხილა საქართველოს წინაშე მდგარი საფრთხეები და გამოწვევები და ავსტრიულ მხარეს მიაწოდა ინფორმაცია საქართველოს ოკუპირებულ ტერიტორიებზე უსაფრთხოებისა და ადამიანის უფლებათა კუთხით არსებულ ვითარების, ფაქტობრივი ანექსიისკენ გადადგმული ნაბიჯების შესახებ და ხაზი გაუსვა საერთაშორისო პარტნიორების აქტიური პოზიციის აუცილებლობას. თეიმურაზ ჯანჯალიამ მადლობა გადაუხადა ავსტრიულ მხარეს ევროკავშირის სადამკვირვებლო მისიაში მონაწილეობის გამო. ავსტრიის დელეგაციის ხელმძღვანელმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის უპირობო მხარდაჭერა.
🔗 კონსულტაციების ფარგლებში განხილვის თემას წარმოადგენდა ნაყოფიერი თანამშრომლობა საერთაშორისო ორგანიზაციების ფარგლებში და კანდიდატურების ურთიერთმხარდაჭერის საკითხები. მხარეები შეთანხმდნენ განაგრძონ მჭიდრო თანამშრომლობა და რეგულარული კომუნიკაცია როგორც ორმხრივ, ასევე მრავალმხრივ ფორმატებში.