საიტზე მიმდინარეობს ტექნიკური სამუშაოები

ელჩის ოპედი ავსტრიულ გამოცემა KURIER-ში

🇬🇪საქართველოს დამოუკიდებლობის დღესთან დაკავშირებით, ავსტრიული გამოცემა KURIER ელჩის ოპედს აქვეყნებს სახელწოდებით - „რატომ მიისწრაფვის საქართველო ევროკავშირის კანდიდატი ქვეყნის სტატუსის მოსაპოვებლად”.
📌ოპედში საქართველოს ელჩი აღნიშნავს, რომ დღიდან დამოუკიდებლობის ხელახლა მოპოვებისა, საქართველო აქტიურად მიისწრაფვის ევროპული ინტეგრაციისკენ, რისი მცდელობაც ქვეყანას ჯერ კიდევ 100-ზე მეტი წლის წინ, 1918 წელს ევროპულ ფასეულობებზე დაფუძნებული პირველი დემოკრატიული რესპუბლიკის დამყარებით ჰქონდა, თუმცა საბჭოთა ოკუპაციის გამო ამის შესაძლებლობა მთელი შვიდი ათწლეულით წაერთვა.
📌ელჩი აღნიშნავს, რომ ჩვენმა ქვეყანამ დიდი ძალისხმევა გასწია ამ შესაძლებლობის უკან დასაბრუნებლად, რასაც ევროინტეგრაციის გზაზე მიღწეული შედეგებიც მოწმობს. ევროკავშირთან მრავალწლიანი თანამშრომლობის მნიშვნელოვან შედეგებს შორის არის - 2016 წელს ამოქმედებული ასოცირების შეთანხმება, ღრმა და ყოვლისმომცველი თავისუფალი სავაჭრო სივრცის შესახებ შეთანხმება (DCFTA), ასევე, ევროკავშირის წევრ ქვეყნებთან საქართველოს მოქალაქეებისთვის უვიზო მიმოსვლის შემოღება, რომელიც ერთ-ერთ ყველაზე ხელშესახებ შედეგს წარმოადგენს და ამავდროულად, მკაფიო გზავნილი და უკუგებაა საქართველოს ევროპულ მისწრაფებაზე, აღნიშნავს ქეთევან ციხელაშვილი.
📌ევროკავშირთან ურთიერთობის კიდევ ერთ მნიშვნელოვან მოვლენად ელჩი გასულ წელს უკრაინასა და მოლდოვასთან ერთად, ასოცირებული ტრიოს ფორმატის დაარსებას მიიჩნევს, რომლითაც ამ სამმა ქვეყანამ კიდევ ერთხელ მკაფიოდ დააფიქსირა საკუთარი ამბიცია, გახდეს ევროკავშირის სრულფასოვანი წევრი.
📌ამ მიზნის მიღწევა ეგზისტენციალური რისკების ფასად გვიჯდება, აღნიშნავს საქართველოს ელჩი და ამ კონტექსტში ხაზს უსვამს, რომ რუსეთის მიერ უკრაინაზე განხორციელებული თავდასხმით, რომელიც უკვე სამი თვეა მიმდინარეობს, კიდევ ერთხელ გახდა ცხადი ის, რაც საქართველომ 2008 წელს უკვე გამოსცადა- რუსეთი ძალისმიერი მეთოდებით ეწინააღმდეგება ჩვენი ქვეყნების დასავლურ არჩევანს. „ჩვენს დასავლურ ინტეგრაციას ალტერნატივა არ აქვს. ეს არის ჩვენი თავისუფლებისა და დამოუკიდებლობის მანიფესტი, რომელიც ეყრდნობა ჩვენს ისტორიულ, ცივილიზაციურ და კულტურულ წინამძღვრებს. სწორედ ამიტომ, ჩვენი მოსახლეობის 80 პროცენტზე მეტი მუდმივად მხარს უჭერს დასავლურ ინტეგრაციას“ - აღნიშნავს ქეთევან ციხელაშვილი.

📌ოპედის დასასრულს ელჩი იმედს გამოთქვამს, რომ ევროკავშირის მიერ ჩვენი განაცხადის თაობაზე მიღებული გადაწყვეტილება იქნება მკაფიო და ძლიერი გზავნილი, რაც მნიშვნელოვანია არა მხოლოდ ჩვენი ქვეყნებისთვის, არამედ მთელი ევროპის რეგიონში უსაფრთხოების უზრუნველყოფისთვის.

 

ინტერვიუ იხილეთ ვრცლად: https://kurier.at/meinung/gastkommentar/eine-klare-antwort-der-eu/402022779