შეხვედრა წამყვანი ავსტრიული ლოგისტიკური კომპანიის, Gebrüder Weiss მენეჯმენტთან
28 მარტს საქართველოს საგანგებო და სრულუფლებიანმა ელჩმა ალექსანდრე მაისურაძემ გაცნობითი შეხვედრა გამართა წამყვანი ავსტრიული ლოგისტიკური კომპანიის Gebrüder Weiss მმართველი საბჭოს თავმჯდომარესთან, ვოლფრამ ზენგერ-ვაისთან და რეგიონულ დირექტორთან, თომას მოზერთან.
საქართველოს ელჩმა აღნიშნა, რომ საქართველო-ავსტრიის ორმხრივ ურთიერთობებში ეკონომიკური კავშირების განმტკიცება დღის წესრიგის ერთ-ერთი პრიორიტეტული საკითხია. ალექსანდრე მაისურაძე მიესალმა გებრიუდერ ვაისის მხრიდან გამოხატულ ნდობას საქართველოს საინვესტიციო გარემოსადმი, აღინიშნა, რომ 2012 წლიდან დღემდე კომპანია 3-ჯერ გაფართოვდა, ხოლო უკანასკნელი ინვესტიცია და ახალი ლოგისტიკური ტერმინალი თბილისში 2024 წლის ოქტომბერში გაიხსნა, რა დროსაც კომპანიამ დამატებით 11,5 მილიონი ევროს ინვესტიცია განახორციელა.
თავის მხრივ, მმართველი საბჭოს თავმჯდომარემ, ვოლფრამ ზენგერ-ვაისმა აღნიშნა, რომ საქართველოში გაკეთებული ინვესტიცია კომპანიისთვის ყველაზე წარმატებული ისტორიაა. ხაზი გაესვა საქართველოს, როგორც რეგიონული ჰაბის მნიშვნელობას და მის პოტენციალს. ავსტრიულმა მხარემ ყურადღება გაამახვილა საქართველოში ბიზნესის კეთების სიმარტივეზე და მადლიერება გამოხატა ქართული მხრიდან B2G ჭრილში არსებული მხარდაჭერისთვის. ამასთან, კომპანიის წარმომადგენლებმა აღნიშნეს, რომ მათ საქართველოში კიდევ უფრო შორსმიმავალი გეგმები აქვთ.
შეხვედრის დასასრულს მხარეებმა თანამშრომლობის მზაობა დაადასტურეს.
